Zaboor 142

sakht museebat men madad kee pukaar

¹hikmat ka geet. dua jo daaood nay kee jab vah ghaar men tha.

main madad kay liyay cheekhta chillaata rabb ko pukaarta hoon, main zordaar aavaaz say rabb say iltija karta hoon.

²main apnee aah-o-zaaree us kay saamnay undel deta, apnee tamaam museebat us kay huzoor pesh karta hoon.

³jab meree rooh meray andar nidhaal ho jaatee hai to too hee meree raah jaanta hai. jis raastay men main chalta hoon us men logon nay phanda chhupaaya hai.

⁴main dahenee taraf nazar daal kar dekhta hoon, lekin koee naheen hai jo mera khayaal karay. main bach naheen sakta, koee naheen hai jo meree jaan kee fikr karay.

⁵ai rabb, main madad kay liyay tujhay pukaarta hoon. main kaheta hoon, “too meree panaahgaah aur zindon kay mulk men mera mauroosee hissa hai.”

⁶meree cheekhon par dhyaan day, kyoonki main bahut past ho gaya hoon. mujhay un say chhuda jo mera peechha kar rahay hain, kyoonki main un par qaaboo naheen pa sakta.

⁷meree jaan ko qaidkhaanay say nikaal la taaki teray naam kee sitaaish karoon. jab too meray saath bhalaaee karega to raastbaaz meray ird-gird jama ho jaaengay.