Zaboor 22
raastbaaz ka dukh
1daaood ka zaboor. mooseeqee kay raahanuma kay liyay. tarz : tuloo-ay-subah kee hirnee.
ai meray khuda, ai meray khuda, too nay mujhay kyoon tark kar diya hai? main cheekh raha hoon, lekin meree najaat nazar naheen aatee.
2ai meray khuda, din ko main chillaata hoon, lekin too javaab naheen deta. raat ko pukaarta hoon, lekin aaraam naheen paata.
3lekin too quddoos hai, too jo israaeel kee madahsaraaee par takhtnasheen hota hai.
4tujh par hamaaray baapdaada nay bharosa rakha, aur jab bharosa rakha to too nay unhen rihaaee dee.
5jab unhon nay madad kay liyay tujhay pukaara to bachnay ka raasta khul gaya. jab unhon nay tujh par etimaad kiya to sharminda na huay.
6lekin main keeda hoon, mujhay insaan naheen samjha jaata. log meree beizzatee kartay, mujhay haqeer jaantay hain.
7sab mujhay dekh kar mera mazaaq udaatay hain. vah munh bana kar tauba tauba kartay aur kahetay hain,
8“us nay apna muaamala rabb kay sapurd kiya hai. ab rabb hee usay bachaaay. vahee usay chhutkaara day, kyoonki vahee us say khush hai.”
9yaqeenan too mujhay maan kay pet say nikaal laaya. main abhee maan ka doodh peeta tha ki too nay meray dil men bharosa paida kiya.
10joon hee main paida hua mujhay tujh par chhod diya gaya. maan kay pet say hee too mera khuda raha hai.
11mujh say door na rah. kyoonki museebat nay mera daaman pakad liya hai, aur koee naheen jo meree madad karay.
12mut’addid bailon nay mujhay gher liya, basan kay taaqatvar saand chaaron taraf jama ho gaay hain.
13meray khilaaf unhon nay apnay munh khol diay hain, us dahaadatay huay sherbabar kee tarah jo shikaar ko phaadnay kay josh men a gaya hai.
14mujhay paanee kee tarah zameen par undela gaya hai, meree tamaam haddiyaan alag alag ho gaee hain, jism kay andar mera dil mom kee tarah pighal gaya hai.
15meree taaqat theekray kee tarah khushk ho gaee, meree zabaan taaloo say chipak gaee hai. haan, too nay mujhay maut kee khaak men lita diya hai.
16kutton nay mujhay gher rakha, shareeron kay jathay nay mera ihaata kiya hai. unhon nay meray haathon aur paaon ko chhed daala hai.
17main apnee haddiyon ko gin sakta hoon. log ghoor ghoor kar meree museebat say khush hotay hain.
18vah aapas men meray kapday baant letay aur meray libaas par qur’a daaltay hain.
19lekin too ai rabb, door na rah! ai meree quvvat, meree madad karnay kay liyay jaldee kar!
20meree jaan ko talvaar say bacha, meree zindagee ko kuttay kay panjay say chhuda.
21sher kay munh say mujhay makhlsee day, janglee bailon kay seengon say rihaaee ata kar.
ai rabb, too nay meree sunee hai!
22main apnay bhaaiyon kay saamnay teray naam ka elaan karoonga, jamaaat kay darmiyaan teree madahsaraaee karoonga.
23tum jo rabb ka khauf maantay ho, us kee tamjeed karo! ai yaaqoob kee tamaam aulaad, us ka ehatiraam kar! ai israaeel kay tamaam farzando, us say khauf khaao!
24kyoonki na us nay museebatzada ka dukh haqeer jaana, na us kee takleef say ghin khaaee. us nay apna munh us say na chhupaaya balki us kee sunee jab vah madad kay liyay cheekhnay-chillaanay laga.
25ai khuda, baday ijtima men main teree sitaaish karoonga, khudaatarason kay saamnay apnee mannat pooree karoonga.
26naachaar jee bhar kar khaaengay, rabb kay taalib us kee hamd-o-sana karengay. tumhaaray dil abad tak zinda rahen!
27log duniya kee intiha tak rabb ko yaad karkay us kee taraf rujoo karengay. ghair’aqvaam kay tamaam khaandaan usay sijda karengay.
28kyoonki rabb ko hee baadshaahee ka ikhtiyaar haasil hai, vahee aqvaam par hukoomat karta hai.
29duniya kay tamaam baday log us kay huzoor khaaengay aur sijda karengay. khaak men utarnay vaalay sab us kay saamnay jhuk jaaengay, vah sab jo apnee zindagee ko khud qaaim naheen rakh saktay.
30us kay farzand us kee khidmat karengay. ek aanay vaalee nasal ko rabb kay baaray men sunaaya jaaega.
31haan, vah a kar us kee raastee ek qaum ko sunaaengay jo abhee paida naheen huee, kyoonki us nay yah kuchh kiya hai.