Zaboor 27
allaah say rifaaqat
1daaood ka zaboor.
rabb meree raushnee aur meree najaat hai, main kis say daroon? rabb meree jaan kee panaahgaah hai, main kis say dahshat khaaoon?
2jab shareer mujh par hamla karen taaki mujhay hadap kar len, jab meray mukhaalif aur dushman mujh par toot paden to vah thokar kha kar gir jaaengay.
3go fauj mujhay gher lay mera dil khauf naheen khaaega, go meray khilaaf jang chhid jaaay mera bharosa qaaim rahega.
4rabb say meree ek guzaarish hai, main ek hee baat chaahata hoon. yah ki jeetay jee rabb kay ghar men rah kar us kee shafqat say lutf’andoz ho sakoon, ki us kee sukoonatgaah men thaher kar mahev-ay-khayaal rah sakoon.
5kyoonki museebat kay din vah mujhay apnee sukoonatgaah men panaah dega, mujhay apnay khaimay men chhupa lega, mujhay utha kar oonchee chataan par rakhega.
6ab main apnay dushmanon par sarbuland hoonga, agarchi unhon nay mujhay gher rakha hai. main us kay khaimay men khushee kay naaray laga kar qurbaaniyaan pesh karoonga, saaz baja kar rabb kee madahsaraaee karoonga.
7ai rabb, meree aavaaz sun jab main tujhay pukaaroon, mujh par meharbaanee karkay meree sun.
8mera dil tujhay yaad dilaata hai ki too nay khud farmaaya, “meray chiharay kay taalib raho!” ai rabb, main teray hee chiharay ka taalib raha hoon.
9apnay chiharay ko mujh say chhupaaay na rakh, apnay khaadim ko ghussay say apnay huzoor say na nikaal. kyoonki too hee mera sahaara raha hai. ai meree najaat kay khuda, mujhay na chhod, mujhay tark na kar.
10kyoonki meray maan-baap nay mujhay tark kar diya hai, lekin rabb mujhay qabool karkay apnay ghar men laaega.
11ai rabb, mujhay apnee raah kee tarbiyat day, hamvaar raastay par meree raahanumaaee kar taaki apnay dushmanon say mahfooz rahoon.
12mujhay mukhaalifon kay laalach men na aanay day, kyoonki jhootay gavaah meray khilaaf uth khaday huay hain jo tashaddud karnay kay liyay tayyaar hain.
13lekin mera poora eemaan yah hai ki main zindon kay mulk men rah kar rabb kee bhalaaee dekhoonga.
14rabb kay intizaar men rah! mazboot aur diler ho, aur rabb kay intizaar men rah