Zaboor 30
maut say chhutkaaray par shukrguzaaree
1daaood ka zaboor. rabb kay ghar kee makhsoosiyat kay mauqay par geet.
ai rabb, main teree sitaaish karta hoon, kyoonki too nay mujhay gaheraaiyon men say khainch nikaala. too nay meray dushmanon ko mujh par baghlen bajaanay ka mauqa naheen diya.
2ai rabb meray khuda, main nay cheekhtay chillaatay huay tujh say madad maangee, aur too nay mujhay shifa dee.
3ai rabb, too meree jaan ko paataal say nikaal laaya, too nay meree jaan ko maut kay gadhay men utarnay say bachaaya hai.
4ai eemaanadaaro, saaz baja kar rabb kee taareef men geet gaao. us kay muqaddas naam kee hamd-o-sana karo.
5kyoonki vah lamha bhar kay liyay ghussay hota, lekin zindagee bhar kay liyay meharbaanee karta hai. go shaam ko rona paday, lekin subah ko ham khushee manaaengay.
6jab haalaat pursukoon thay to main bola, “main kabhee naheen dagmagaaoonga.”
7ai rabb, jab too mujh say khush tha to too nay mujhay mazboot pahaad par rakh diya. lekin jab too nay apna chihara mujh say chhupa liya to main sakht ghabra gaya.
8ai rabb, main nay tujhay pukaara, haan khudaavand say main nay iltija kee,
9“kya faaida hai agar main halaak ho kar maut kay gadhay men utar jaaoon? kya khaak teree sitaaish karegee? kya vah logon ko teree vafaadaaree kay baaray men bataaegee?
10ai rabb, meree sun, mujh par meharbaanee kar. ai rabb, meree madad karnay kay liyay a!”
11too nay mera maatam khushee kay naach men badal diya, too nay meray maatmee kapday utaar kar mujhay shaadmaanee say mulabbas kiya.
12kyoonki too chaahata hai ki meree jaan khaamosh na ho balki geet ga kar teree tamjeed kartee rahay. ai rabb meray khuda, main abad tak teree hamd-o-sana karoonga.