Zaboor 35
shareeron kay hamlon say rihaaee kay liyay duaa
1daaood ka zaboor.
ai rabb, un say jhagad jo meray saath jhagadtay hain, un say lad jo meray saath ladtay hain.
2lambee aur chhotee dhaal pakad lay aur uth kar meree madad karnay a.
3nezay aur barchhee ko nikaal kar unhen rok day jo mera taaqqub kar rahay hain! meree jaan say farma, “main teree najaat hoon!”
4jo meree jaan kay liyay koshaan hain un ka munh kaala ho jaaay, vah rusva ho jaaen. jo mujhay museebat men daalnay kay mansoobay baandh rahay hain vah peechhay hat kar sharminda hon.
5vah hava men bhoosay kee tarah ud jaaen jab rabb ka farishta unhen bhaga day.
6un ka raasta taareek aur phisalna ho jab rabb ka farishta un kay peechhay pad jaaay.
7kyoonki unhon nay besabab aur chupkay say meray raastay men jaal bichhaaya, bilaavajah mujhay pakadnay ka gadha khoda hai.
8is liyay tabaahee achaanak hee un par a paday, pahelay unhen pata hee na chalay. jo jaal unhon nay chupkay say bichhaaya us men vah khud ulajh jaaen, jis gadhay ko unhon nay khoda us men vah khud gir kar tabaah ho jaaen.
9tab meree jaan rabb kee khushee manaaegee aur us kee najaat kay baais shaadmaan hogee.
10meray tamaam aaza kah uthengay, “ai rabb, kaun teree maanind hai? koee bhee naheen! kyoonki too hee museebatzada ko zabardast aadmee say chhutkaara deta, too hee naachaar aur ghareeb ko lootnay vaalay kay haath say bacha leta hai.”
11zaalim gavaah meray khilaaf uth khaday ho rahay hain. vah aisee baaton kay baaray men meree poochhgichh kar rahay hain jin say main vaaqif hee naheen.
12vah meree nekee kay ivz mujhay nuqsaan pahuncha rahay hain. ab meree jaan tan-ay-tanaha hai.
13jab vah beemaar huay to main nay taat odh kar aur roza rakh kar apnee jaan ko dukh diya. kaash meree dua meree god men vaapas aaay!
14main nay yoon maatam kiya jaisay mera koee dost ya bhaaee ho. main maatmee libaas pahen kar yoon khaak men jhuk gaya jaisay apnee maan ka janaaza ho.
15lekin jab main khud thokar khaanay laga to vah khush ho kar meray khilaaf jama huay. vah mujh par hamla karnay kay liyay ikatthay huay, aur mujhay maaloom hee naheen tha. vah mujhay phaadtay rahay aur baaz na aaay.
16musalsal kufr bak bak kar vah mera mazaaq udaatay, meray khilaaf daant peestay thay.
17ai rabb, too kab tak khaamoshee say dekhta rahega? meree jaan ko un kee tabaahakun harkaton say bacha, meree zindagee ko javaan sheron say chhutkaara day.
18tab main badee jamaaat men teree sitaaish aur baday hujoom men teree taareef karoonga.
19unhen mujh par baghlen bajaanay na day jo besabab meray dushman hain. unhen mujh par naak-bhaun chadhaanay na day jo bilaavajah mujh say keena rakhtay hain.
20kyoonki vah khair aur salaamatee kee baaten naheen kartay balki un kay khilaaf farebdih mansoobay baandhtay hain jo amn aur sukoon say mulk men rahetay hain.
21vah munh phaad kar kahetay hain, “lo jee, ham nay apnee aankhon say us kee harkaten dekhee hain!”
22ai rabb, tujhay sab kuchh nazar aaya hai. khaamosh na rah! ai rabb, mujh say door na ho.
23ai rabb meray khuda, jaag uth! meray difa men uth kar un say lad!
24ai rabb meray khuda, apnee raastee kay mutaabiq mera insaaf kar. unhen mujh par baghlen bajaanay na day.
25vah dil men na sochen, “lo jee, hamaara iraada poora hua hai!” vah na bolen, “ham nay usay hadap kar liya hai.”
26jo mera nuqsaan dekh kar khush huay un sab ka munh kaala ho jaaay, vah sharminda ho jaaen. jo mujhay daba kar apnay aap par fakhar kartay hain vah sharmindagee aur rusvaaee say mulabbas ho jaaen.
27lekin jo meray insaaf kay aarzoomand hain vah khush hon aur shaadiyaana bajaaen. vah kahen, “rabb kee badee taareef ho, jo apnay khaadim kee khairiyat chaahata hai.”
28tab meree zabaan teree raastee bayaan karegee, vah saara din teree tamjeed kartee rahegee.