Zaboor 39
insaan kay faanee honay kay pesh-ay-nazar iltijaa
1daaood ka zaboor. yadootoon kay liyay. mooseeqee kay raahanuma kay liyay.
main bola, “main apnee raahon par dhyaan doonga taaki apnee zabaan say gunaah na karoon. jab tak bedeen meray saamnay rahay us vaqt tak apnay munh ko lagaam diay rahoonga.”
2main chup-chaap ho gaya aur achchhee cheezon say door rah kar khaamosh raha. tab meree aziyat badh gaee.
3mera dil pareshaanee say tapnay laga, meray karaahatay karaahatay meray andar bechainee kee aag see bhadak uthee. tab baat zabaan par a gaee,
4“ai rabb, mujhay mera anjaam aur meree umr kee hadd dikha taaki main jaan loon ki kitna faanee hoon.
5dekh, meree zindagee ka dauraaniya teray saamnay lamha bhar ka hai. meree pooree umr teray nazdeek kuchh bhee naheen hai. har insaan dam bhar ka hee hai, khwaah vah kitnee hee mazbootee say khada kyoon na ho. (silaah)
6jab vah idhar udhar ghoomay phiray to saaya hee hai. us ka shor-sharaaba baatil hai, aur go vah daulat jama karnay men masroof rahay to bhee usay maaloom naheen ki baad men kis kay qabzay men aaegee.”
7chunaanchay ai rabb, main kis kay intizaar men rahoon? too hee meree vaahid ummeed hai!
8meray tamaam gunaahon say mujhay chhutkaara day. ahemaq ko meree rusvaaee karnay na day.
9main khaamosh ho gaya hoon aur kabhee apna munh naheen kholta, kyoonki yah sab kuchh teray hee haath say hua hai.
10apna azaab mujh say door kar! teray haath kee zarbon say main halaak ho raha hoon.
11jab too insaan ko us kay qusoor kee munaasib saza day kar us ko tambeeh karta hai to us kee khoobsoortee keeda lagay kapday kee tarah jaatee rahetee hai. har insaan dam bhar ka hee hai. (silaah)
12ai rabb, meree dua sun aur madad kay liyay meree aahon par tavajjuh day. meray aansooon ko dekh kar khaamosh na rah. kyoonki main teray huzoor rahenay vaala pardesee, apnay tamaam baapdaada kee tarah teray huzoor basnay vaala ghairshaheree hoon.
13mujh say baaz a taaki main kooch karkay nest ho jaanay say pahelay ek baar phir hashshaash-bashshaash ho jaaoon.