Zaboor 40
shukr aur darakhwaast
1daaood ka zaboor. mooseeqee kay raahanuma kay liyay.
main sabr say rabb kay intizaar men raha to vah meree taraf maail hua aur madad kay liyay meree cheekhon par tavajjuh dee.
2vah mujhay tabaahee kay gadhay say khainch laaya, daldal aur keechad say nikaal laaya. us nay meray paaon ko chataan par rakh diya, aur ab main mazbootee say chal phir sakta hoon.
3us nay meray munh men naya geet daal diya, hamaaray khuda kee hamd-o-sana ka geet ubharnay diya. bahut say log yah dekhengay aur khauf kha kar rabb par bharosa rakhengay.
4mubaarak hai vah jo rabb par poora bharosa rakhta hai, jo tang karnay vaalon aur fareb men uljhay huon kee taraf rukh naheen karta.
5ai rabb meray khuda, baar baar too nay hamen apnay mojizay dikhaaay, jagah-ba-jagah apnay mansoobay vujood men la kar hamaaree madad kee. tujh jaisa koee naheen hai. teray azeem kaam beshumaar hain, main un kee pooree faherist bata bhee naheen sakta.
6too qurbaaniyaan aur nazren naheen chaahata tha, lekin too nay meray kaanon ko khol diya. too nay bhasm honay vaalee qurbaaniyon aur gunaah kee qurbaaniyon ka taqaaza na kiya.
7phir main bol utha, “main haazir hoon jis tarah meray baaray men kalaam-ay-muqaddas [a] lafzee tarjuma : kitaab kay toomaar men. men likha hai.
8ai meray khuda, main khushee say teree marzee pooree karta hoon, teree shareeat meray dil men tik gaee hai.”
9main nay baday ijtima men raastee kee khushkhabaree sunaaee hai. ai rabb, yaqeenan too jaanta hai ki main nay apnay honton ko band na rakha.
10main nay teree raastee apnay dil men chhupaaay na rakhee balki teree vafaadaaree aur najaat bayaan kee. main nay baday ijtima men teree shafqat aur sadaaqat kee ek baat bhee posheeda na rakhee.
11ai rabb, too mujhay apnay rahem say maheroom naheen rakhega, teree meharbaanee aur vafaadaaree musalsal meree nigahbaanee karengee.
12kyoonki beshumaar takleephon nay mujhay gher rakha hai, meray gunaahon nay aakhirkaar mujhay a pakda hai. ab main nazar bhee naheen utha sakta. vah meray sar kay baalon say ziyaada hain, is liyay main himmat haar gaya hoon.
13ai rabb, meharbaanee karkay mujhay bacha! ai rabb, meree madad karnay men jaldee kar!
14meray jaanee dushman sab sharminda ho jaaen, un kee sakht rusvaaee ho jaaay. jo meree museebat dekhnay say lutf uthaatay hain vah peechhay hat jaaen, un ka munh kaala ho jaaay.
15jo meree museebat dekh kar qahqaha lagaatay hain vah sharm kay maaray tabaah ho jaaen.
16lekin teray taalib shaadmaan ho kar teree khushee manaaen. jinhen teree najaat piyaaree hai vah hamesha kahen, “rabb azeem hai!”
17main naachaar aur zarooratmand hoon, lekin rabb mera khayaal rakhta hai. too hee mera sahaara aur mera najaatadihanda hai. ai meray khuda, der na kar