Zaboor 55
jhootay bhaaiyon par shikaayat
1daaood ka zaboor. mooseeqee kay raahanuma kay liyay. hikmat ka yah geet taardaar saazon kay saath gaana hai.
ai allaah, meree dua par dhyaan day, apnay aap ko meree iltija say chhupaaay na rakh.
2mujh par ghaur kar, meree sun. main bechainee say idhar udhar ghoomtay huay aahen bhar raha hoon.
3kyoonki dushman shor macha raha, bedeen mujhay tang kar raha hai. vah mujh par aafat laanay par tulay huay hain, ghussay men meree mukhaalafat kar rahay hain.
4mera dil meray andar tadap raha hai, maut kee dahshat mujh par chha gaee hai.
5khauf aur larzish mujh par taaree huee, haibat mujh par ghaalib a gaee hai.
6main bola, “kaash meray kabootar kay say par hon taaki ud kar aaraam-o-sukoon pa sakoon!
7tab main door tak bhaag kar registaan men basera karta,
8main jaldee say kaheen panaah leta jahaan tez aandhee aur toofaan say mahfooz raheta.” (silaah)
9ai rabb, un men abtaree paida kar, un kee zabaan men ikhtilaaf daal! kyoonki mujhay shaher men har taraf zulm aur jhagday nazar aatay hain.
10din raat vah faseel par chakkar kaattay hain, aur shaher fasaad aur kharaabee say bhara raheta hai.
11us kay beech men tabaahee kee hukoomat hai, aur zulm aur fareb us kay chauk ko naheen chhodtay.
12agar koee dushman meree rusvaaee karta to qaabil-ay-bardaasht hota. agar mujh say nafrat karnay vaala mujhay daba kar apnay aap ko sarfaraaz karta to main us say chhup jaata.
13lekin too hee nay yah kiya, too jo mujh jaisa hai, jo mera qareebee dost aur hamraaz hai.
14meree teray saath kitnee achchhee rifaaqat thee jab ham hujoom kay saath allaah kay ghar kee taraf chaltay gaay!
15maut achaanak hee unhen apnee girift men lay lay. zinda hee vah paataal men utar jaaen, kyoonki buraaee nay un men apna ghar bana liya hai.
16lekin main pukaar kar allaah say madad maangta hoon, aur rabb mujhay najaat dega.
17main har vaqt aah-o-zaaree karta aur karaahata raheta hoon, khwaah subah ho, khwaah dopaher ya shaam. aur vah meree sunega.
18vah fidya day kar meree jaan ko un say chhudaaega jo meray khilaaf lad rahay hain. go un kee taadaad badee hai vah mujhay aaraam-o-sukoon dega.
19allaah jo azal say takhtnasheen hai meree sun kar unhen munaasib javaab dega. (silaah) kyoonki na vah tabdeel ho jaaengay, na kabhee allaah ka khauf maanengay.
20us shakhs nay apna haath apnay doston kay khilaaf uthaaya, us nay apna ahd tod liya hai.
21us kee zabaan par makkhan kee see chiknee-chupdee baaten aur dil men jang hai. us kay tel say ziyaada narm alfaaz haqeeqat men khainchee huee talvaaren hain.
22apna bojh rabb par daal to vah tujhay sambhaalega . vah raastbaaz ko kabhee dagmagaanay naheen dega.
23lekin ai allaah, too unhen tabaahee kay gadhay men utarnay dega. khoonkhaar aur dhokebaaz aadhee umr bhee naheen paaengay balki jaldee marengay. lekin main tujh par bharosa rakhta hoon.