Zaboor 57
aazmaaish men allaah par etimaad
1daaood ka zaboor. mooseeqee kay raahanuma kay liyay. tarz : tabaah na kar. yah sunahera geet us vaqt say mutaalliq hai jab vah saaool say bhaag kar ghaar men chhup gaya.
ai allaah, mujh par meharbaanee kar, mujh par meharbaanee kar! kyoonki meree jaan tujh men panaah letee hai. jab tak aafat mujh par say guzar na jaaay main teray paron kay saay men panaah loonga.
2main allaah t’aala ko pukaarta hoon, allaah say jo mera muaamala theek karega.
3vah aasmaan say madad bhej kar mujhay chhutkaara dega aur un kee rusvaaee karega jo mujhay tang kar rahay hain. (silaah) allaah apna karam aur vafaadaaree bhejega.
4main insaan ko hadap karnay vaalay sherbabron kay beech men leta hua hoon, un kay darmiyaan jin kay daant nezay aur teer hain aur jin kee zabaan tez talvaar hai.
5ai allaah, aasmaan par sarbuland ho ja! tera jalaal pooree duniya par chha jaaay!
6unhon nay meray qadmon kay aagay phanda bichha diya, aur meree jaan khaak men dab gaee hai. unhon nay meray saamnay gadha khod liya, lekin vah khud us men gir gaay hain. (silaah)
7ai allaah, mera dil mazboot, mera dil saabitqadam hai. main saaz baja kar teree madahsaraaee karoonga.
8ai meree jaan, jaag uth! ai sitaar aur sarod, jaag utho! aao, main tuloo-ay-subah ko jagaaoon.
9ai rabb, qaumon men main teree sitaaish, ummaton men teree madahsaraaee karoonga.
10kyoonki teree azeem shafqat aasmaan jitnee buland hai, teree vafaadaaree baadlon tak pahunchtee hai.
11ai allaah, aasmaan par sarfaraaz ho! tera jalaal pooree duniya par chha jaaay.