Zaboor 8
makhlooqaat ka taaj
1daaood ka zaboor. mooseeqee kay raahanuma kay liyay. tarz : gitteet.
ai rabb hamaaray aaqa, tera naam pooree duniya men kitna shaandaar hai! too nay aasmaan par hee apna jalaal zaahir kar diya hai.
2apnay mukhaalifon kay javaab men too nay chhotay bachchon aur sheerakhwaaron kee zabaan ko tayyaar kiya hai taaki vah teree quvvat say dushman aur keenaaparvar ko khatm karen.
3jab main teray aasmaan ka mulaahaza karta hoon jo teree ungaliyon ka kaam hai, chaand aur sitaaron par ghaur karta hoon jin ko too nay apnee apnee jagah par qaaim kiyaa
4to insaan kaun hai ki too usay yaad karay ya aadamzaad ki too us ka khayaal rakhay?
5too nay usay farishton say kuchh hee kam banaayaa [a] ek aur mumkina tarjuma : too nay usay thodee der kay liyay farishton say kam kar diya (dekhiay ibraaniyon 2:7,9). , too nay usay jalaal aur izzat ka taaj pahenaaya.
6too nay usay apnay haathon kay kaamon par muqarrar kiya, sab kuchh us kay paaon kay neechay kar diya,
7khwaah bhed-bakriyaan hon khwaah gaay-bail, janglee jaanvar,
8parinday, machhliyaan ya samundaree raahon par chalnay vaalay baaqee tamaam jaanvar.
9ai rabb hamaaray aaqa, pooree duniya men tera naam kitna shaandaar hai