Zaboor 89
israaeel kee museebat aur daaood say vaadaa
1aitaan izraahee ka hikmat ka geet.
main abad tak rabb kee meharbaaniyon kee madahsaraaee karoonga, pusht-dar-pusht munh say teree vafa ka elaan karoonga.
2kyoonki main bola, “teree shafqat hamesha tak qaaim hai, too nay apnee vafa kee mazboot bunyaad aasmaan par hee rakhee hai.”
3too nay farmaaya, “main nay apnay chunay huay banday say ahd baandha, apnay khaadim daaood say qasam kha kar vaada kiya hai,
4‘main teree nasal ko hamesha tak qaaim rakhoonga, tera takht hamesha tak mazboot rakhoonga’.” (silaah)
5ai rabb, aasmaan teray mojizon kee sitaaish karengay, muqaddaseen kee jamaaat men hee teree vafaadaaree kee tamjeed karengay.
6kyoonki baadlon men kaun rabb kee maanind hai? ilaahee hastiyon men say kaun rabb kee maanind hai?
7jo bhee muqaddaseen kee majlis men shaamil hain vah allaah say khauf khaatay hain. jo bhee us kay ird-gird hotay hain un par us kee azmat aur rob chhaaya raheta hai.
8ai rabb, ai lashkaron kay khuda, kaun teree maanind hai? ai rabb, too qavee aur apnee vafa say ghira raheta hai.
9too thaathen maartay huay samundar par hukoomat karta hai. jab vah maujzan ho to too usay thama deta hai.
10too nay samundaree ajhdahay raheb ko kuchal diya, aur vah maqtool kee maanind ban gaya. apnay qavee baazoo say too nay apnay dushmanon ko tittar-bittar kar diya.
11aasmaan-o-zameen teray hee hain. duniya aur jo kuchh us men hai too nay qaaim kiya.
12too nay shimaal-o-junoob ko khalaq kiya. taboor aur harmoon teray naam kee khushee men naaray lagaatay hain.
13tera baazoo qavee aur tera haath taaqatvar hai. tera dahena haath azeem kaam karnay kay liyay tayyaar hai.
14raastee aur insaaf teray takht kee bunyaad hain. shafqat aur vafa teray aagay aagay chaltee hain.
15mubaarak hai vah qaum jo teree khushee kay naaray laga sakay. ai rabb, vah teray chiharay kay noor men chalengay.
16rozaana vah teray naam kee khushee manaaengay aur teree raastee say sarfaraaz hongay.
17kyoonki too hee un kee taaqat kee shaan hai, aur too apnay karam say hamen sarfaraaz karega.
18kyoonki hamaaree dhaal rabb hee kee hai, hamaara baadshaah israaeel kay quddoos hee ka hai.
19maazee men too roya men apnay eemaandaaron say hamkalaam hua. us vaqt too nay farmaaya, “main nay ek soormay ko taaqat say navaaza hai, qaum men say ek ko chun kar sarfaraaz kiya hai.
20main nay apnay khaadim daaood ko pa liya aur usay apnay muqaddas tel say masah kiya hai.
21mera haath usay qaaim rakhega, mera baazoo usay taqviyat dega.
22dushman us par ghaalib naheen aaega, shareer usay khaak men naheen milaaengay.
23us kay aagay aagay main us kay dushmanon ko paash paash karoonga. jo us say nafrat rakhtay hain unhen zameen par patakh doonga.
24meree vafa aur meree shafqat us kay saath rahengee, meray naam say vah sarfaraaz hoga.
25main us kay haath ko samundar par aur us kay dahenay haath ko daryaaon par hukoomat karnay doonga.
26vah mujhay pukaar kar kahega, ‘too mera baap, mera khuda aur meree najaat kee chataan hai.’
27main usay apna pahelautha aur duniya ka sab say aala baadshaah banaaoonga.
28main usay hamesha tak apnee shafqat say navaazta rahoonga, mera us kay saath ahd kabhee tamaam naheen hoga.
29main us kee nasal hamesha tak qaaim rakhoonga, jab tak aasmaan qaaim hai us ka takht qaaim rakhoonga.
30agar us kay betay meree shareeat tark karkay meray ahkaam par amal na karen,
31agar vah meray farmaanon kee behuramtee karkay meree hidaayaat kay mutaabiq zindagee na guzaaren
32to main laathee lay kar un kee taadeeb karoonga aur muhalak vabaaon say un kay gunaahon kee saza doonga.
33lekin main usay apnee shafqat say maheroom naheen karoonga, apnee vafa ka inkaar naheen karoonga.
34na main apnay ahd kee behuramtee karoonga, na vah kuchh tabdeel karoonga jo main nay farmaaya hai.
35main nay ek baar sada kay liyay apnee quddoosiyat kee qasam kha kar vaada kiya hai, aur main daaood ko kabhee dhoka naheen doonga.
36us kee nasal abad tak qaaim rahegee, us ka takht aaftaab kee tarah meray saamnay khada rahega.
37chaand kee tarah vah hamesha tak barqaraar rahega, aur jo gavaah baadlon men hai vah vafaadaar hai.” (silaah)
38lekin ab too nay apnay masah kiay huay khaadim ko thakra kar radd kiya, too us say ghazabnaak ho gaya hai.
39too nay apnay khaadim ka ahd naamanzoor kiya aur us ka taaj khaak men mila kar us kee behuramtee kee hai.
40too nay us kee tamaam faseelen dha kar us kay qilaon ko malbay kay dher bana diya hai.
41jo bhee vahaan say guzray vah usay loot leta hai. vah apnay padosiyon kay liyay mazaaq ka nishaana ban gaya hai.
42too nay us kay mukhaalifon ka dahena haath sarfaraaz kiya, us kay tamaam dushmanon ko khush kar diya hai.
43too nay us kee talvaar kee tezee beasar karkay usay jang men fatah paanay say rok diya hai.
44too nay us kee shaan khatm karkay us ka takht zameen par patakh diya hai.
45too nay us kee javaanee kay din mukhtasar karkay usay rusvaaee kee chaadar men lapeta hai. (silaah)
46ai rabb, kab tak? kya too apnay aap ko hamesha tak chhupaaay rakhega? kya tera qaher abad tak aag kee tarah bhadakta rahega?
47yaad rahay ki meree zindagee kitnee mukhtasar hai, ki too nay tamaam insaan kitnay faanee khalaq kiay hain.
48kaun hai jis ka maut say vaasta na paday, kaun hai jo hamesha zinda rahay? kaun apnee jaan ko maut kay qabzay say bachaaay rakh sakta hai? (silaah)
49ai rabb, teree vah puraanee meharbaaniyaan kahaan hain jin ka vaada too nay apnee vafa kee qasam kha kar daaood say kiya?
50ai rabb, apnay khaadimon kee khajaalat yaad kar. mera seena mut’addid qaumon kee laan-taan say dukhta hai,
51kyoonki ai rabb, teray dushmanon nay mujhay laan-taan kee, unhon nay teray masah kiay huay khaadim ko har qadam par laan-taan kee hai!
52abad tak rabb kee hamd ho! aameen, phir aameen.