Zaboor 92
allaah kee sitaaish karnay kee khushee
1zaboor. sabat kay liyay geet.
rabb ka shukr karna bhala hai. ai allaah t’aala, teray naam kee madahsaraaee karna bhala hai.
2subah ko teree shafqat aur raat ko teree vafa ka elaan karna bhala hai,
3khaaskar jab saath saath das taaron vaala saaz, sitaar aur sarod bajtay hain.
4kyoonki ai rabb, too nay mujhay apnay kaamon say khush kiya hai, aur teray haathon kay kaam dekh kar main khushee kay naaray lagaata hoon.
5ai rabb, teray kaam kitnay azeem, teray khayaalaat kitnay gaheray hain.
6naadaan yah naheen jaanta, ahemaq ko is kee samajh naheen aatee.
7go bedeen ghaas kee tarah phoot nikaltay aur badkaar sab phaltay phooltay hain, lekin aakhirkaar vah hamesha kay liyay halaak ho jaaengay.
8magar too, ai rabb, abad tak sarbuland rahega.
9kyoonki teray dushman, ai rabb, teray dushman yaqeenan tabaah ho jaaengay, badkaar sab tittar-bittar ho jaaengay.
10too nay mujhay janglee bail kee see taaqat day kar taaza tel say masah kiya hai.
11meree aankh apnay dushmanon kee shikast say aur meray kaan un shareeron kay anjaam say lutf’andoz huay hain jo meray khilaaf uth khaday huay hain.
12raastbaaz khajoor kay darakht kee tarah phalay phoolega, vah lubnaan kay deodaar kay darakht kee tarah badhega.
13jo pauday rabb kee sukoonatgaah men lagaaay gaay hain vah hamaaray khuda kee baargaahon men phalen phoolengay.
14vah budhaapay men bhee phal laaengay aur tar-o-taaza aur haray-bharay rahengay.
15us vaqt bhee vah elaan karengay, “rabb raast hai. vah meree chataan hai, aur us men naaraastee naheen hotee.”