Zaboor 95
parastish aur faramaambardaaree kee daavat
1aao, ham shaadiyaana baja kar rabb kee madahsaraaee karen, khushee kay naaray laga kar apnee najaat kee chataan kee tamjeed karen!
2aao, ham shukrguzaaree kay saath us kay huzoor aaen, geet ga kar us kee sitaaish karen.
3kyoonki rabb azeem khuda aur tamaam maaboodon par azeem baadshaah hai.
4us kay haath men zameen kee gaheraaiyaan hain, aur pahaad kee bulandiyaan bhee usee kee hain.
5samundar us ka hai, kyoonki us nay usay khalaq kiya. khushkee us kee hai, kyoonki us kay haathon nay usay tashkeel diya.
6aao ham sijda karen aur rabb apnay khaaliq kay saamnay jhuk kar ghutnay teken.
7kyoonki vah hamaara khuda hai aur ham us kee charaagaah kee qaum aur us kay haath kee bheden hain. agar tum aaj us kee aavaaz suno
8“to apnay dilon ko sakht na karo jis tarah mareeba men hua, jis tarah registaan men massa men hua.
9vahaan tumhaaray baapdaada nay mujhay aazmaaya aur jaancha, haalaanki unhon nay meray kaam dekh liyay thay.
10chaalees saal main us nasal say ghin khaata raha. main bola, ‘un kay dil hamesha saheeh raah say hat jaatay hain, aur vah meree raahen naheen jaantay.’
11apnay ghazab men main nay qasam khaaee, ‘yah kabhee us mulk men daakhil naheen hongay jahaan main unhen sukoon deta’.”