Paidaaish 21
ishaaq kee paidaaish
1tab rabb nay saara kay saath vaisa hee kiya jaisa us nay farmaaya tha. jo vaada us nay saara kay baaray men kiya tha usay us nay poora kiya. 2vah haamila huee aur beta paida hua. ain us vaqt boodhay ibraaheem kay haan beta paida hua jo allaah nay muqarrar karkay usay bataaya tha.
3ibraaheem nay apnay is betay ka naam ishaaq yaanee ‘vah hansta hai’ rakha. 4jab ishaaq aath din ka tha to ibraaheem nay us ka khatna karaaya, jis tarah allaah nay usay hukm diya tha. 5jab ishaaq paida hua us vaqt ibraaheem 100 saal ka tha. 6saara nay kaha, “allaah nay mujhay hansaaya, aur har koee jo meray baaray men yah sunega hansega. 7is say pahelay kaun ibraaheem say yah kahenay kee jur’at kar sakta tha ki saara apnay bachchon ko doodh pilaaegee? aur ab meray haan beta paida hua hai, agarchi ibraaheem boodha ho gaya hai.”
8ishaaq bada hota gaya. jab us ka doodh chhudaaya gaya to ibraaheem nay us kay liyay badee ziyaafat kee.
ibraaheem haajira aur ismaaeel ko nikaal deta hai
9ek din saara nay dekha ki misree laundee haajira ka beta ismaaeel ishaaq ka mazaaq uda raha hai. 10us nay ibraaheem say kaha, “is laundee aur us kay betay ko ghar say nikaal den, kyoonki vah meray betay ishaaq kay saath meeraas naheen paaega.”
11ibraaheem ko yah baat bahut buree lagee. aakhir ismaaeel bhee us ka beta tha. 12lekin allaah nay us say kaha, “jo baat saara nay apnee laundee aur us kay betay kay baaray men kahee hai vah tujhay buree na lagay. saara kee baat maan lay, kyoonki teree nasal ishaaq hee say qaaim rahegee. 13lekin main ismaaeel say bhee ek qaum banaaoonga, kyoonki vah tera beta hai.”
14ibraaheem subah-saveray utha. us nay rotee aur paanee kee mashk haajira kay kandhon par rakh kar usay ladkay kay saath ghar say nikaal diya. haajira chaltay chaltay bair-saba kay registaan men idhar udhar phirnay lagee. 15phir paanee khatm ho gaya. haajira ladkay ko kisee jhaadee kay neechay chhod kar 16koee 300 fut door baith gaee. kyoonki us nay dil men kaha, “main usay martay naheen dekh saktee.” vah vahaan baith kar ronay lagee.
17lekin allaah nay betay kee rotee huee aavaaz sun lee. allaah kay farishtay nay aasmaan par say pukaar kar haajira say baat kee, “haajira, kya baat hai? mat dar, kyoonki allaah nay ladkay ka jo vahaan pada hai rona sun liya hai. 18uth, ladkay ko utha kar us ka haath thaam lay, kyoonki main us say ek badee qaum banaaoonga.”
19phir allaah nay haajira kee aankhen khol deen, aur us kee nazar ek kuen par padee. vah vahaan gaee aur mashk ko paanee say bhar kar ladkay ko pilaaya.
20allaah ladkay kay saath tha. vah javaan hua aur teer’andaaz ban kar biyaabaan men rahenay laga. 21jab vah faaraan kay registaan men raheta tha to us kee maan nay usay ek misree aurat say byaah diya.
abeemlik kay saath ahd
22un dinon men abeemlik aur us kay sipaahasaalaar feekul nay ibraaheem say kaha, “jo kuchh bhee aap kartay hain allaah aap kay saath hai. 23ab mujh say allaah kee qasam khaaen ki aap mujhay aur meree aal-o-aulaad ko dhoka naheen dengay. mujh par aur is mulk par jis men aap pardesee hain vahee meharbaanee karen jo main nay aap par kee hai.”
24ibraaheem nay javaab diya, “main qasam khaata hoon.” 25phir us nay abeemlik say shikaayat kartay huay kaha, “aap kay bandon nay hamaaray ek kuen par qabza kar liya hai.” 26abeemlik nay kaha, “mujhay naheen maaloom ki kis nay aisa kiya hai. aap nay bhee mujhay naheen bataaya. aaj main pahelee dafa yah baat sun raha hoon.”
27tab ibraaheem nay abeemlik ko bhed-bakriyaan aur gaay-bail diay, aur donon nay ek doosray kay saath ahd baandha. 28phir ibraaheem nay bhed kay saat maada bachchon ko alag kar liya. 29abeemlik nay poochha, “aap nay yah kyoon kiya?” 30ibraaheem nay javaab diya, “bhed kay in saat bachchon ko mujh say lay len. yah is kay gavaah hon ki main nay is kuen ko khoda hai.” 31is liyay us jagah ka naam bair-saba yaanee ‘qasam ka kuaan’ rakha gaya, kyoonki vahaan un donon mardon nay qasam khaaee.
32yoon unhon nay bair-saba men ek doosray say ahd baandha. phir abeemlik aur feekul filistiyon kay mulk vaapas chalay gaay. 33is kay baad ibraaheem nay bair-saba men jhaao ka darakht lagaaya. vahaan us nay rabb ka naam lay kar us kee ibaadat kee jo abdee khuda hai. 34ibraaheem bahut arsay tak filistiyon kay mulk men aabaad raha, lekin ajnabee kee haisiyat say.